Ons kom uit ‘n groot familie. ‘n Baie groot, luidrugtige, erg emosionele familie. Boere-mense. Dis soms moeilik om buitestanders te oortuig dat ons vir mekaar lief is, en werklik van mekaar hou, want wat ookal ons voel, voel ons met oorgawe. As ons ongelukkig is weet die wêreld dit, en as ons kwaad is kan Wêreld Oorlog 3 net sowel uitgebreek het. Ons baklei maklik met mekaar, en dan vloei die trane. Maar ons maak ook weer maklik op, en dan is dit “smiles for days”. So erg as wat ons teen mekaar kan draai in ‘n geskil so vinnig en “fierce” kan ons saamstaan wanneer die aanslagte van buite kom. Ons klomp saam by ‘n begrafnis is nogals ‘n belewenis. Eers word daar staaltjies vertel van die oorledene, dan ‘n paar strydbyle weer opgegrawe voor ons die geliefde begrawe, dan huil almal so dat ons die Vaaldam weer kan vol kry, en dan begin die sports – terwyl almal anders (lees: nie-familie) die komkommertoebroodjies en vleisbolletjies eet word die afgestorwene se lewe gevier. Daar word gelag, soms gesing, as daar ‘n klavier is sal dit ook ingespan word. Die samekoms verander van ‘n tranedal na ‘n partytjie. Onsensitief? Glad nie. Soos ek genoem het, groot familie, baie emosioneel, regte Boeremense. Ons doen alles met oorgawe, van lief hê tot baklei. Lewe in oorgawe. En dit is dan ook hoe ek nog altyd dink oor ons liewe nasie. My bloed, my erfenis, my kultuur. Ons staan op wanneer nodig, ons baklei vir wat saak maak, en lag uit ons mae uit. Die sê-ding is nie verniet “Afrikaners is plesierig” nie. Ons is werklik plesierig, en ‘n plesier om om te wees.
Maar wat maak van ons Afrikaners, en Afrikaanses? Is ons uitkenmerke die hoeveelheid Khaki wat jy dra, hoe mooi jy jou “r’e” rol wanneer jy ingils praat, jou diep liefde vir rugby, of hoe lekker jy kan lang-arm sokkie op Adam en Kurt? Hopelik nie, want dan voldoen ek nie en is ek definitief nie ‘n Afrikaner, of Afrikaanse, nie! Ek is van mening dat dit wat ons anders maak ons unieke humorsin is. Ons kan die mees ernstige situasie benader met ‘n grappie of kommentaar wat ander sal ervaar as lighartig. Dit is ook dan ons manier om trauma te verwerk. Die vliegtuigwrak het nog nie eers afgekoel nie en daar sal reeds grappies wees oor valskermspring en Red Bull. Ons is vlymskerp, vinnig, en opreg. En ons hou van partytjies, dit kan jy glo! Wat ‘n plesier.
By Laughing Chefs Boersjiek probeer ons hierdie beeld trots uitdra. Ons is gemaklik, informeel, en altyd reg met ‘n grappie. Indien die ligterkant van die lewe nie vir jou is nie, en jy nie kan verstaan hoe mense enige situasie kan omskep in iets om oor te glimlag nie, dan hou liefs verby. Ons neem niks behalwe gasvryheid, sekuriteit (en gesondheid), en samesyn ernstig op nie. Daar is nie baie reëls of taboes nie, solank almal hulself geniet (en veilig is). Van die kinders tot die grootouers, almal moet net kan ontspan. Ons is plesierig, en wil graag hê dat jy plesierig saam met ons sal wees!
